Brud Nevez

 

ar gelaouenn a vez plijadur o lenn

 

Pez a blij eo ar glao, an eien, an avel

Pez a red ha pez a stroñs

Ar blijadur o chom dihun, pell, oh huñvreal

E sioulder meur on abardaez-noz.

 

Pez a blij eo ar han, an dasson

Barzoniez plên, geriou ar ru

An heol o vond da guz er mor souezuz

Aodou sioul ar bugaleaj noaz.

 

Hag ar joa kared, beza karet ha kredi

Ema an nen e-tal an dianao

Euz an disheol tre en heol kaoud soñj

E oa kaer an devez ma oa or fiziañs ennañ.

 

Sklêrijenn al loar war kalon ar brug

A hell dougen ar joa euz eun nozvez didrouz

N'eus ken med an noz hag a glev or pedennou

Trouz on eneou, gwechou zo, o nijal kuit.

 

François Kerrien

Brezoneg gand Brud Nevez

Ar jestr eo a gont

Danevell

 

Saig 'oa toullbahet. Greet en-doa traou euzuz diêz da zisplegañ amañ. En toull 'oa bet plantet evid eun toullad mat a vloaveziou. Kabluz, dilorh, ne felle ket dezañ gweled den ebed. Goulennet en-doa groñs ne deufe den da zireñkañ anezañ. Ne felle ket dezañ kuitaad e doull-kambr. Goulennet en-doa ne deufe den d’e weladenniñ, nag e gerent tost, na kennebeud eur gweladenner-prizon pe eun aluzenner. Klask a ree lenn memestra. Eun diwaller-prizon a zigase dezañ, beb an amzer, eul leor euz levraoueg an toull-bah. Ne veze komz ebed etrezo, pe nebeud. Saig a skrive dezañ war eun tamm paper peseurt leor en-dije c’hoant da lenn. Ne zigase ket bep tro an hini a oa skrivet war an tamm paper med eul levr all bennag, a zoñje dezañ a refe plijadur da Zaig. Dond a ree a-benn gwech an amzer.

Tammou traou bihan a skrive ivez Saig war eur haier-skol, eun dastumadenn stumm eun deizleor.

Eun dervez en-doa merzet Saig e oa merien en e doull-kambr […].

Marcel Diouris

Naig Rozmor

Eur gwiskamant seiz eo he barzoniez

 

Testeni Maguy Kerisit

Al leor diweza bet embannet gand Emgleo Breiz eo bet Barzoniez klok Naig Rozmor, dindan an talbenn "E donder va huñvre / Au cœur de mon rêve". Gand Maguy Kerisit eo bet prientet an embann, ha hi ive eo he-deus troet evid ar wech kenta he barzonegou e galleg. Setu amañ al linennou kenta euz ar ger a-raog he-deus skrivet, a heller kaoud ive e niverenn 313 Brud Nevez.

 

Pell zo e anavezan barzoniez Naig Rozmor : penaoz, ha me brezonegerez ha lennerez, ne vefen ket bet dedennet raktal gand heh oberenn ? N’eo ket puill ar barzezed en or yez, ha rouesoh c’hoaz ar re dezo an donezon a oa hini Naig. Eet eo da anaon e miz meurz 2015, ha red eo din lonka kerse rag biskoaz n’em-eus bet tro d’en em gavoud ganti e gwirionez. Pemzeg vloaz zo marteze, em-oa bet c’hoant da houlenn he chomleh digand Emgleo Breiz, da skriva dezi ha lavared trugarez evid ar from hag an eurvad a dañvaen gand he skridou. N’em-oa ket greet, dre lentegez muioh eged dre ziegi. Kerse, pa lavaren deoh […] 

 

Tresadennou Myriam Coadou

Awenet eo bet Myriam Coadou gand barzonegou Naig Rozmor : ganti eo bet skeudennaouet al leor bet embannet gand Emgleo Breiz, "E donder va huñvre".

 

War golo al leor : unan euz he zresadennou.

Evid lenn ar pennadou a-uz war o hed…

 

Hag evid kaoud ar skridou lennegez, an oll anezo, e hellit atao, a-dra-zur, klask kaoud niverenn 313 Brud Nevez hag ar re all tu pe du, med…

 

Ar gwella tra a hellfeh ober koulskoude eo prena anezo ! Grit !  7 € ar skwerenn war baper (keit ha ma vo deuz outo !) ha 4 € ar stumm niverel. Hag evid se n'ho-peus nemed eun dra d'ober : Penaoz kaoud