Interramant ar Garront Zuig
Setu ar gontadenn diwar bluenn ar skrivagner Yeun ar Gow a vefe peadra, evel a skrivem uhelloh, da zevel diwarni eur gwir vandenn-dreset euz ar re vodernna. Hag a helled lenn e niverenn genta Brud e 1957.
M'ho-peus c'hoant da gleved ano euz ar spontadenn am-oe eun nozvez, diwezad-braz o tistroi d'ar gêr, e livirin deoh e oan digouezet e penn ar Garront Zuig, e-leh ma klevis daouzeg taol hanter-noz o son en iliz-parrez, evidon da veza, a-benn neuze, eur pennad mad a vale diouti. Diavel ha didrouz e oa an amzer, hogen teñval a-walh o veza ma ne oa ket savet hoaz al loar. Teñvalloh e oe dioustu en-dro din, kerkent ha m'en em gavis dindan ar volz a ree, a-uh d'ar garront zon, keuneud stank ha deliaoueg an daou gleuz uhel a zave unan a bep tu dezi.
E friko merh Kerligoan e oan bet er vourh, ha, daoust da ze, ne oan ket badaouet an disterra. Med chomet e oan da zavarad goude koan, diwezad oh echui evel boaz, gand eun nebeud mignoned din e ostalidi Per an Hamon. Hag, e-ser tapa eur banneig pe zaou, e oan bet daleet ganto pelloh evid ma zoñjen.
Mond a reen etremeg Kervorvan, ma hêr, sonn ma 'fenn ha divorfil-kaer ma spered, med pounner a-walh ma divesker war-lerh abadennou-dañs stank am-oa grêt etre an daou ziazez. Pa vezen o frikota, n'eo ket chom da zelled ouz an dud all da zañsal a blije din, hogen lammad ive d'o heul er c'hoari, da 'fringal evelto, ne lavaran ket.
Goude beza kerzet gand ar garront skoachelleg, e teuas ma daoulagad da voaza ouz an deñvalijenn hag e oa êsoh din bale gand ma hent. Med dizale e klevis eun trouzig trist, heñvel ouz mouez eur hlohig-kañv hijet beb eur mare. Hanter-vouget a-wechou ha pellig etre pep hini, e tassone goustadig ar hlohadou, o koueza hini ha hini, evel greun o tizihilia diouz pennou-id re aho. Nehet eun disterra, e ris eun harp da zelaou hag, a-barz nemeur, e kreñvaas hag e tostaas an trouz […].
Yeun ar Gow
Brud
Diwar an niverenn 1
Hañv 1957
