Eur vouez a vo par d'ar re gaerra
Goude ma vije bet klevet o lakaad an dud da zañsal er festou-noz gand Mari Stervinou, goude eur bladennig warni peder ganaouenn, e teu Rozenn Talec en-dro gand eur bladenn fardet hag aozet asamblez gand Yannig Noguet.
Anavezet eo Yannig abaoe pell evid beza bet o seni deuz an akordeoñs diatoneg gand Gwenfoll, Fillifala, Gilles Servat, Delahaye pe c’hoaz Jacques Pellen. Deuz ar rummad sonerien akordeoñs « nevez »-ze, eo a-dra-sur Yannig Noguet unan euz ar re wella toud : lakaad a ra startijenn ha spered er pez a ra. Toniou koz a vez sonet gantañ evel just, ha toniou all savet gantañ e-unan, ha n’int ket divalo, evel m’ho-po tu da gleved war Mouezh an Diaoul peogwir ez eus seiz ton gantañ diwar an daouzeg a zo war ar bladenn.
Seni a ra Yannig ingal gand eur homper all, Sylvain Barou, doue nevez ar fleüt a-dreuz, an uilleann pipes ha me 'oar-me. Anavezet am-eus anezañ e Roazon ouspenn deg vloaz a zo, ha d’ar poent-se dija e oa anezañ eur soner ampart-tre. N’eo ket kosaad a ra Sylvain Barou, gwellaad eo ! D’an deiz a hirio e vez diêz keja gantañ e Roazon, peogwir e vez aliez o foeta an hentou hag al leurennou er bed a-bez, asamblez gand Dan ar Braz ha nousped strollad euz Iwerzon pe Bro-Skos. War bemp kanaouenn e vez klevet Sylvain war Mouezh an Diaoul, ha bewech e ro eul liou ouspenn d’ar ganaouenn, evel e Kalon glac’haret.
Keleier ha n'int ket euz Plogoñ
Ne glaskan ket lavared e vije bet paour hag enoeüz an traou heb Sylvain Barou, med pa ‘m-eus resevet ar bladenn 'm-eus en em houlennet peseurt muzik a vije da gleved gand eur vouez hag eun akordeoñs diatoneg nemetken. An dibab kanaouennou, mouez tomm Rozenn, hag an doare da ficha an toniou eo a ra pinvidigez ar bladenn. Eul labour dreist e-neus kaset Yannig Noguet da benn, rag laoskel a ra plas d’ar han. Harpet eo mouez Rozenn gand kensonerez ha lusk boest an diaoul. Fin ha speredeg am-eus kavet al labour greet en-dro d’an akordeoñs.
Deuz kreiz Breiz e teu Rozenn, hag evel just e kaver toniou euz ar horn-ze war Mouezh an Diaoul, a gomañs gand eur galv d’an dañs, ar gavotenn, anad deoh ! Bet eo bet o klask geriou kanaouennou e leor dastumadennou Y.-F. Kemener, ha brao eo disklêria deuz peleh e teuont - aliesoh-aliesa e vez greet an dra-ze gand an arzourien a-hirio. Gwechou all e kemer geriou hengounel, ha cheñch a ra anezo ma vez ezomm, evel da skwer 'barz Keleier Plogoñ, eur ganaouenn skrivet gand Denez Abernot d’ar poent ma oa ano da zevel eur greizenn nukleel eno : dond a ra da veza, dindan bluenn Rozenn, eur ganaouenn a-eneb an êrborz a fell da lod sevel nepell euz an Naoned.
A-wechou eo tost ar muzik-se euz ar « swing » : an akordeoñs an hini a zo kaoz, hag ivez an doare da gana traou zo, ha ne vefen ket displijet o selaou deuz an daou-ze asamblez gand paotred Ozan Trio !
Yaouank eo Rozenn Talec c’hoaz, hag o teski ema bepred. Dre Kreiz Breizh Akademi eo paseet, ha gand Marthe Vassallo ema o labourad. Setu perag e vez klevet, amañ hag a-hont, o kana dres evelti : eun doare da boueza war eur zilabenn, pe zoken eun tu da zistaga ar geriou, a zo tostoh euz Tregastel pe Rostren evid na vefe deuz Karaez. Heñvel eo evid toud an dud : gra 'giz ar mestr hag e teski !
Eun taol brao eo Mouezh an Diaoul evid eur bladenn genta - heb dizoñjal an hini vihan gand Mari Stervinou. Kavet he-deus Rozenn eur homper a-feson, ha ma vank dezi marteze c’hoaz eun tamm nerz en he mouez pa gan uhel, a-benn nebeud amzer, d’am meno, e vo komzet euz outi evel ma reer euz Annie Ebrel, Marthe Vassallo pe Nolwen Korbell.
Bernez Quillien
Diwar Brud Nevez, n° 299, miz gouere 2013
Rozenn Talec & Yannig Noguet, Mouezh an Diaoul, embannet ha skignet gand Coop Breizh.
Lehienn internet: http://www.rozenntalec.bzh
